Saturday, March 19, 2011

رحلة إلي لجنة الاستفتاء


"الاستفتاء علي التعديلات الدستورية"
اول محاولة حقيقية للمصريين علي طريق الديموقراطية
بالطبع انا لازلت في سنة اولي سياسة، فلن اتحدث عن تحليل سياسي للتعديلات فانا اعتقد اننا اكتفينا تحليلا لها علي مدي الايام الماضية. انا ساتحدث فقط عما رايته خلال يومي القصير في لجان الاستفتاء


بدأ اليوم او بدأت الرحلة الساعة 9 صباحا، نزلت عائلتي كلها مع بعض (بابا و ماما و اخواتي). طبعا كنا فاكرين اننا كده بدري قوي و احنا اللي هنروح نفتح اللجنة. طبعا وصلنا لأقرب لجنة للبيت و بسم الله ما شاء الله لقينا طوابير طوييييييييلة جدا و نظرا لظروفنا ساعتها قررنا اننا نجرب نروح لجنة ثانية. لان الجنة الاولي هي وجهة منطقة واسعة عندنا لكن اللجنة الثانية ديه تعتبر في شارع جانبي فتوقعنا ان الضغط عليها هيكون اقل
فعلا روحنا اللجنة الثانية و كانت افضي كتير عن اللجنة الاولي (الناس اللي راحوا بعدنا قالوا ان الاثنين ازحم من بعض). و الحمد لله ما كنش فيها طوابير للسيدات ساعتها (عشان السيدات كانوا بييجوا مجموعات مع بعض، 3 او 4 مع بعض فكانوا بيدخلوا علي طول و كمان كان في لجنة للسيدات منعا للازدحام) ، المهم انا و ماما و اخواتي دخلنا علي طول. الموضوع كله لم يتعدي 3 دقائق من اول وصولي لباب اللجنة الي نهاية تصويتي

-------------------------------------------------------------
نيجي بقي لبعض الملحوظات او الحاجات اللي عدت عليا خصوصا اننا لفينا شوية بعد ما خلصنا

مش عارفة ليه حسيت ان النهاردة كان عيد و كنا رايحين صلاة العيد الصبح. ناس كتير صاحيين بدري و كلهم رايحيين في اتجاه واحد و كلهم مبتسمين او علي الاقل مش مكشرين. و ناس كتير نازلة كعائلات، كل واحد اخذ زوجته و اولاده (حتي لو اقل من 18 سنة) و ابوه و امه. كل واحد نازل مع صحابه
منظر الناس الكثير ده مش بشوفه غير في العيد و الرحلات. يمكن عشان كده انا قلت "رحلة إلي لجنة الاستفتاء" عشان انا حسيت اني رايحة رحلة، رحلة لمكان حلو قوي و اتبسط فيه قوي

الموضوع كان منظم جدا في اللجنة. من اول ما وصلنا لباب اللجنة و لحد ما خلصنا و دايما كان في حد بيقولك تروح فين و تعمل ايه من قبل حتي ماتسأل

انا اضايقت ان ماكنش فيه ستارة اكتب وراها. كان نفسي قوي الموضوع يبقي كامل للأخر

طبعا كان في ناس رايحة تقول نعم او لا عشان اتقالها قول كده من غير اسباب حقيقية. و ناس كتير لعبت علي وتر الدين من جميع الأطراف. و ناس لعبت علي رجوع النظام القديم لو قلت نعم او ان البلد هتخرب لو قلت لا. اعتقد ان في اي الإنتخابات اللي جاية او اي استفتاء جاي محتاجيين نوصل للناس دي اكتر

فئات الناس اللي نزلت كانت جميع الفئات بدون استثناء. انا شفت شباب 18 سنة و ناس متجوزيين 40 سنة و ناس فوق ال70 سنة. و شفت الموظف و الصعيدي و ست البيت و المدرس حتي البياعين في السوق هيروحوا يقولوا رأيهم

و احنا راجعيين عدينا علي جيران لينا في العمارة صحيناهم و كان في ناس منهم مكسليين بس خليناهم ينزلوا . و دي حاجة خليتني مبسوطة زيادة
-------------------------------------------------------------

باختصار انا نفسي يبقي في استفتاء كل يوم عشان الناس تفضل تقول صوتها و عشان الناس تتعلم تختار صح من غير ما حد يختارلها

الديموقراطية تجربة .. الخطأ فيها احتمال وارد لكن لن نتعلم إلا بالتجربة و الخطأ

كل استفتاء و انتخابات و انتوا طيبين