Tuesday, September 24, 2013

شكر و احترام و تقدير - 4


ساعات ربنا بيكتبلك انك تتعرف علي ناس يجبروك تعيد تفكير في حياتك و تتعرف علي حاجات جديدة. أنا بقي ربنا رزقني (و الحمد لله) بأكثر من حد من الناس دي.


من أهم الناس دي: شيماء

الطيبة متمثلة في انسان :)
معرفتنا كانت سطحية جداً في ثانوي و إعدادي هندسة بس من اول ما دخلنا قسمنا العزيز و إحنا بقينا قدر بعض :)
عدي علينا مواقف من كثرتها بطلت أعدهم، اتخانقنا و اتصالحنا و ضحكنا و بكينا و اتكلمنا و سكتنا.
لو فكرت في انسان عارف المصائب اللي انا عملتها السبع سنين اللي فاتوا فاكيد هيبقي شيماء. و يوم ما بحب اعمل مصيبة و احتاج مساعدة حد بكلم شيماء من غير تفكير.

شيماء مش بس صاحبتي، شيمو أخت و انتيمة و دكتورة النفسية و الحد اللي هيبقي معايا في اي مصيبة أحب اعملها :)

ربنا يكرمها و يسعدها و يفرح قلبها و يديم المحبة بينا ... قولوا أميين :)

Saturday, September 21, 2013

شكر و احترام و تقدير - 3

ساعات ربنا بيكتبلك انك تتعرف علي ناس يجبروك تعيد تفكير في حياتك و تتعرف علي حاجات جديدة. أنا بقي ربنا رزقني (و الحمد لله) بأكثر من حد من الناس دي.

من أهم الناس دي: بابا

نختلف سياسيا في حاجات كثير و لكن نتفق حياتيا في حاجات كثير ثانية.
امتع لحظات حياتي لما اقعد علي حجره و ياخدني في حضنه و انا كبيرة كده و ابقي عاملة زي العيلة اللي مكملتش سنة.


اخدت منه حاجات كثير في شخصيته و في تفكيره و حتي في الشكل. كان نفسي اخد لون عينيه بس ربنا ما ارادش بقي.


فخورة بكل حاجة و كل لحظة عديت عليا معاه. اكثر لحظة فخورة بها في حياتي، و انا بقوله اني رتبت علي دفعتي في اعدادي هندسة. البسمة اللي شفتها في عينه و حضنه ساعتها عمري ما هنساهم :)
بحب كل لحظة و كل ضحكة و كل مناكشة معاه. اكثر لحظات باتبسط فيها لما اخليه يضحك و يبقي مبسوط.
بحب خوفه و قلقه علينا .. بحب رقته و عطفه علينا .. بحب بصته لما بيبقي متعصب (بيبقي عسل الصراحة) .. بحب ﻷ بتاعته اللي بعدها مينفعش تفتح الموضوع .. بحب دلعي عليه عشان أقلب اللأ اه.

متأكدة ان لو ربنا كتبلي زوج بيخاف علي عيلته و يتعب عشانها زي بابا، انا هبقي أسعد زوجة.
ربنا يكرمه و يعينه علينا و علي وجع القلب اللي احنا جايبينوا له و يخليك ليا يا بابا :)