Wednesday, October 28, 2015

السند

دائما كنت مقتنعة بأن "عمرك ما هتقدر تسند غيرك و انت مش قادر تسند نفسك". 
النهاردة بس حسيت معناها الحقيقي لما خذلت أعز أصحابي في اني ابقى جنبها. لأول مرة اخلط ما بين وجعي و وجعها و لأول معرفش اشوف الخط الفاصل بين وجعي و احساسها.
اتعودت من زمان اني لما اسمع حد أسمعه باحساسي مش بعقلي و بعد ما استوعب مشاعره كله افكر في تحليل كلامه. النهاردة الوجع خلاني مقدرش اسمع احساسها و لأول مرة أسمح لوجعي أنه يتكلم بدالي.
معتقدش اني كلمة آسفة هتبقي كفاية عشان تعوضها عن موقفي النهاردة.
الشيئ الوحيد اللي أتأكدت منه اني عمرك ما هتقدر تقف جنب اللي بتحبهم و انت جواك وجع.

Sunday, October 11, 2015

مين قال

مين قال إن البعد بيفرق ..
مين قال إن الوجع بيقسي ..
مين قال إن نطق الاسم مش بيهدي ..
مين قال إن الكلمة اللي بتتعب مش بتريح ..
مين قال إن كلمة غضب مش بتوجع الموجوع أكثر ..
مين قال إن قرار ممكن يخلي الروح تبطل تشتاق ..
مين قال إن رغبة ممكن تخلي الغلط صح ..