Friday, August 12, 2011

عدي شهر

من شهر بالضبط كانت أول مرة أشوف المسجد النبوي .. أول صلاة ليا في المسجد النبوي .. أول صلاة فجر أحس بحلاوتها أوي كده.

العمرة دي كانت مميزة ليا بشكل مش عادي .. مش بس عشان أول عمرة أعملها و أنا كبيرة .. لكن عشان وقتها كان ممتاز بالنسبة ليا .. أعتقد اني لو كنت هختار وقتها بنفسي مكنتش هختار وقت أحسن من اللي جت فيه. العمرة دي كانت مميزة عشان كنت مع أسرتي كلها فكنت مش شايلة هم اني أفكر في حد يا تري عامل ايه أو هم أني لازم أكلمهم عشان اطمنهم مثلا. الصحبة اللي كانت معانا كمان كانت مميزة. حاجة تانية أنا بعتبرها كانت مميزة هي التوقيت. سواء في المدينة المنورة أو مكة المكرمة كنا بنوصل في يومين هاديين ... نستمتع بالمكان و الهدوء و بعدين فجأة تلاقي المكان اتملي ناس من كل الجنسيات. أكثر حاجة مميزة للعمرة اننا رجعنا قبل شهر رمضان ب10 أيام تقريبا فملحقتش تنسي احساسك بالعمرة تلاقي نفسك داخل شهر رمضان بكل البركة و الخير اللي فيه.

المدينة المنورة أحلي مدينة في الدنيا .. عمري ما حسيت بالراحة النفسية و الأمان اللي حاسيته هناك قبل كده. استمتعت بكل لحظة قضيتها هناك، بكل صلاة هناك و بكل سجدة.

12/7/2011 الساعة 10:40 مساءا ... زيارة قبر الرسول -صلي الله عليه و سلم- كانت تحفة .. قعدنا تقريبا ساعة ونصف أو ساعتين لحد ما طلعنا من الباب التاني ... أكيد كانت زحمة بس سيبت نفسي لتيار الناس و اتحركت معاهم لحد ما وصلت الروضة الشريفة و عرفت أصلي أنا و ماما و اخواتي هناك رغم الزحمة (أساسا و انت بتسجد في الروضة مش هتحس بأي حد حواليك .. مش هتبقي حاسس غير انك بس بتصلي في الروضة جنب قبر الرسول -صلي الله عليه و سلم- و جنب قبر أبو بكر الصديق و عمر بن الخطاب -رضي الله عنهما-).

زيارة مزارات المدينة المنورة كانت تحفة ... زرنا جبل أحد و شهداء أحد و بعدين زرنا مسجد ذي القبلتين -المسجد اللي نزل فيه الأمر بتغيير القبلة من المسجد الأقصي للمسجد الحرام- و أخيرا زرنا مسجد قباء -أول مسجد بني في الإسلام-. طبعا الصلاة في المسجدين دول كان ليهم احساس مختلف جدا. احساسك و انت بتصلي و دماغك بتعرض تخيل للأحداث اللي حصلت في المكان ده ... نفسي اروح الأماكن ديه عشان أعيش الاحساس ده تاني.

أداء العمرة نفسها بقي حدوتة تانية خالص. العمرة كلها كانت حوالي 3 ساعات.
16/7/2011 الساعة 11:27 مساءا ... أول مرة عيني تشوف فيها الكعبة .. كان احساس مختلف تماما عن رؤية المسجد النبوي لأول مرة ... من الرهبة و العظمة اللي في المكان تقريبا كنت مش حاسة بحاجة ولا عارفة افكر في أي حاجة غير اني أشوف كل حتة في المكان .. زي الطفل الصغير اللي داخل قصر كبير و عظيم أول مرة بيبقي مش بيعمل حاجة غير انه بيشوف كل حته و هو ساكت كانه بيصور المكان بعقله. بس الحمد لله افتكرت ادعي دعوة حلوة أول ما شوفت الكعبة (أو بمعني أصح أنا فضلت أقول الدعاء ده من أول ما دخلت المسجد لحد ما نزلت ساحة الكعبة).
الطريف في الموضوع اني كنت فاكرة الكعبة حاجة حجمها كبير أوي .. فأول ما دخلت قعدت ادور بعيني علي حاجة كبيرة أوي و سوداء رغم اني شايفاها قدامي بس زي ما يكون عقلي كان مش بيستوعب حاجة ساعتها فقعدت حبة كده لحد ما عرفت استوعب اني بجد قدام الكعبة. (:

أكثر أربع سجدات حبتهم هناك (طبعا أي صلاة هناك كانت مميزة بس دول اللي أنا هفضل فاكراهم): أول سجدة في أول صلاة فجر ليا في المسجد النبوي، سجدتين الصلاة في الروضة الشريفة، صلاة الفجر ليلة النصف من شعبان في ساحة المسجد النبوي (كان وقتها في نسمة هواء لطيفة بشكل مش طبيعي .. نسمة تخليك تبتسم و تهدأ و تستمتع باللحظة اللي انت فيها)، و صلاة السنة اللي بعد طواف العمرة في ساحة الكعبة ( أول سجدة قدام بيت ربنا D:).

باختصار مفيد .. أنا قضيت اروع 10 أيام في حياتي لحد دلوقتي هناك ... راجعة و أنا ناوية أغير حبة حاجات في حياتي ... راجعة بعد فترة انفصال 10 أيام عن العالم بتاعي اللي أنا عايشة فيه بقالي 23 سنة و أنا شايفة دنيتي دي بشكل مختلف أو علي الأقل بدأت أشوفها كده ... أنا سافرت العمرة و في دماغي 50 حاجة متلخبطة بس رجعت و أنا أهدا 50 مرة من لما سافرت ... الهدوء ده خلاني اعرف ازاي أرتب شوية حاجات فيهم و أعرف ايه المهم في ال 50 حاجة دول و ايه اللي لازم ارميه ورا ظهري ... الهدوء و الراحة اللي هناك خصوصا في المدينة المنورة بيدوا الفرصة لأي حد انه يهدا و يفكر براحة في حياته كلها او علي الأقل بتدي الفرصة ان ترجع واحد هادي عشان تبدأ تفكر براحة و تخطط حياتك بعد ما ترجع.

يا رب كل واحد مشتاق يروح عمرة أو حج زي ما أنا مشتاقة كده .. ربنا يكتبهاله يا رب.

===============================================
أنا كنت ناوية أكتب الكلام ده أول ما رجعت معرفش ليه آجلته لحد دلوقتي .. يمكن نصيبه انه يتكتب دلوقتي عشان أنا ارجع أفتكر الوقت اللي قضيته هناك.

 طبعا الكعبة في المسجد الحرام

 المسجد النبوي - المدينة المنورة


صور أكثر هنا: