ممكن أفهم؟

هو سؤال واحد "ممكن أفهم ؟؟"

ممكن أفهم احنا رايحين علي فين .. بجد انا مش فاهمة حاجة.
هو احنا رايحين علي حرب مع دول و لا مع بعض و لا مجاعة و لا ايه بالضبط ؟؟

ايه معني ان ناس تدخل تحرق مكان (كنيسة بقي أو جامع أو حتي محل و لا حتي عشة) عشان هو مقتنع انه لازم يعمل كده عشان واحد قاله اعمل كده و ربنا هيحبك أو حتي هو مقتنع بكده من نفسه.

ايه معني ان البلطجة تبقي هي السائدة و التعدي علي الغير في أي حتة أسهل حاجة ممكن تعملها و محدش يقدر يتكلم معاك كمان.
ممكن أفهم لحد امتي هنفضل نفكر في المواقف و نحكم عليها بناءا علي الناس اللي فيها مش الموقف.
ممكن أفهم لحد امتي هنفضل نفكر بعنصرية .آه .. عنصرية. عنصرية بناءا علي الجنس و الدين.

احنا كده بقينا مش في بلد .. اللي اعرفه ان أول حاجات بتبقي في بلد -عشان نقدر نسميها بلد- هو المواطنة (يعني كل الناس مدام من نفس البلد يبقي ليهم نفس الحقوق و عليهم نفس الواجبات) و سيادة القانون (يعني كل الناس سواء أمام قانون واحد و محدش ينفع يتصرف من دماغه و اللي يغلط يتعاقب بالقانون).

هي فين المواطنة لما الناس بتتعامل مع بعض حسب هم تبع انهي دين و هم راجل ولا ست. لو انت زيي تبقي واحد جدع و ميه ميه و لو مش زيي يبقي فيها كلام ثاني.

أنا مش بتكلم عن أحداث اسوان الاخيرة بس. بس هي آخر حاجة حصلت و بجد الموضوع زاد أوي في كل حاجة.

اللي يجنك بقي الناس الطيبة اللي بتقول أصل الكنيسة طالعة بتراخيص مخالفة!! هي دي بقت طريقة حل مخالفات المباني دلوقتي!! يعني هم هدوا كل المباني المخالفة اللي في أسوان!! يعني لو خدت كام شاكوش و طلعت علي عمارات اسكندرية اللي طالعة مخالف و انزل هدم فيها محدش هيقولي انتي بتعملي ايه.

و اللي يجنك أكثر (و اللي بيجنني أنا شخصيا) الناس اللي بتتكلم باسم الاسلام و انه ده الصح اللي كان لازم يحصل!! نعم!!!!!!!! هو الاسلام قال أعمل كده!!
اللي اعرفه ان المفروض المسلم المفروض يحافظ علي حقوق غير المسلمين (حتة لو مالوش دين اصلا) و يجيب حقهم قبل حقه.
اللي أعرفه ان مدام الأغلبية في بلد مسلمين يبقي واجب علينا ان احنا نحمي الباقيين .. هي دي الحماية؟؟
هو مش الله سبحانه و تعالي قال في القرآن: "وَلا تُجَادِلُوا أَهْلَ الْكِتَابِ إِلاَّ بِالَّتِي هِيَ أَحْسَنُ، إِلاَّ الَّذِينَ ظَلَمُوا مِنْهُمْ، وَقولُوا آمَنَّا بِالَّذِي أُنزِلَ إِلَيْنَا وَأُنزِلَ إِلَيْكُمْ وَإِلَهُنَا وَإِلَهُكُمْ وَاحِدٌ، وَنَحْنُ لَهُ مُسْلِمُونَ" (سورة العنكبوت 46).
هي الحسني انك تأذيهم ؟؟
الرسول -صلي الله عليه و سلم- عمره ما أذي واحد من الكفار (اللي كانوا بجد بيأذوه) .. يبقي ازاي قدوتك العليا في الدين بتتعامل كده و انت تيجي تعمل كده مع ناس محدش فيهم كان سبب أذي لك .. طب هتقابله ازاي يوم القيامة وتتطلب شفاعته ؟؟

و سؤال ثاني معلش "هو فين القانون؟"
عارفة ان البلد مش مستقرة و كل يوم بمشكلة شكل و البلد مليانة اعتصامات و اضرابات (و اللي علي فكرة أنا مش شايفة انها حل لأي مشكلة الفترة ديه) بس ده مش معناه اننا نسيب مشكلة بالحجم ده من غير حل.
لو أنا مسئولة في البلد أكيد أي مشكلة بالحجم ده و النتائج بتاعتها لازم تبقي هي اللي ليها الاولوية. كل المشاكل اللي بتتحل بالاعتصامات و الاضرابات بتتحل بشكل سطحي (مسكنات يعني من الآخر) و مفيش مشكلة واحدة اتحلت حل جذري و دائم. و ده مش هينفع في الوضع الحالي.

لو فكرنا بطريقة منطقية المشكلة ديه هنلاقي ان سببها ثلاثة حاجات: غياب القانون الرادع و الجهل و العنصرية أو التعصب (صراحة أنا مش عارفة هو التعصب اللي بيزوّد الجهل و لا الجهل هو اللي بيزوّد التعصب). و حلها في حاجة من اثنين: الناس تفهم بعض و تتعلم تحترم الآخر أو يبقي في حاجة تلزمهم انهم يحترموا بعض (أو علي الأقل يتعاملوا مع بعض من غير أذي لبعض).
أول نوع عايز نفس طويل .. لازم الناس تقاطع أي حد بيقول كلام من مبدأ الكلام .. أي شيخ أو قسيس بيشحن الناس ضد الغير. و لازم الناس اللي فاهمه الدين تبتدي تتكلم و تنزل للناس .. مالوش معني انك تتكلم في التليفزيون أو تكتب في جرايد عشان توصل لناس أصلا مش بيتفرجوا علي تليفزيون و لا بيقروا جرايد. لازم نربي أولادنا ان كل الناس زي بعض و مفيش فرق بينا لا في الحقوق و لا في الواجبات عشان علي الأقل يبقي في أمل ان الجيل اللي بعدنا مايعش زينا لو احنا فشلنا نوصل لطريقة.
ثاني نوع حله سيادة القانون .. كله يبقي عارف القانون و اللي يغلط يتحاسب بغض النظر هو مين.

بصراحة أنا نفسي أفهم ... يا رب ييجي اليوم اللي أفهم فيه.