Monday, November 28, 2011

انتخابات مجلس الشعب 2011



النهارده كانت اول مرة اروح لجنة انتخاب في مجلس الشعب.
الحمد لله انتخبت النهاردة خلاص ... العملية بالنسبة ليا كانت سريعة لدرجة كبيرة انتهت في تقريبا نصف ساعة .. طبعا باقي البيت اخد وقت اكثر من كده بكثير وصل لثلاث ساعات. 
المهم انا قعدت بقالي فترة بفرز المرشحين و من ينفع و مين لأ. الصراحة دي كانت اكثر جزء ظريف في العملية كلها. و الحمدلله عرفت حاجات كثير عن احزاب كثير و ده لوحده حاجة مهمة لواحدة لسه سنة اولي سياسة.


صراحة اللجنة كانت منضبطة و منظمة و الناس في طوابير و القاضي موجود و بيتأكد من البطاقة الشخصية للمنتخبين و من سنهم.

طبعا بما اني مخدتش وقت في اللجنة فمش شوفت مخالفات كثير بس النقط التالية هي اللي اخدت بالي منا في النصف ساعة اللي قضيتها في اللجنة.

مبدئيا انا كنت مدرسة عباس حلمى الثانوية بنين امام مساكن الايجى كاب
لجنة فرعية رقم 438

١- واضح ان مخالفات الاعلانات عند اللجان كانت من اكثر من حزب .... الواضح فيهم طبعا حزب النور و حزب الحرية و العدالة في كل اللجان تقريبا .. بس برده كان في احزاب ثانية و مستقلين ... اللي انا شفته بنفسي كان حزب النور و حزب الحرية و العدالة و المرشح هشام رجب (فئات - دائرة ثالثة) و لجان في المنطقة عندنا كان في اعلانات للكتلة المصرية.

٢- كان في واحدة معلقة زي كارنيه لحزب النور جوه اللجنة و بتكلم الناس و لما سألت واحدة من جهات المتابعة عنها قالتلي لأ دي بس بتفهم الناس يروحوا فين و يصوتوا ازاي ... بس برده اعتقد ان ده مش دورها طالما هي تبع حزب في الانتخابات.

٣- كان في ورق مش مختوم و المراقبين مش اخدين بالهم ... و لما نبهتهم و طلبت ورقة ثانية القاضي قالهم يستبعدوا اي ورق مش مختوم و اخدت ورقة ثانية مختومة ... بس مقدرش احدد هل في ناس صوتت في ورق مش مختوم و لا ﻷ.

٤- كان في ناس بتصوت جنب صندوق الورق من غير ستارة و لا بانر تحت رؤية القاضي و المراقبين و محدش وجههم عشان يروحوا ورا البانر


طبعا لازم نتقبل بعض الاخطاء  اللي حصلت و لازم نتقبل النتيجة مهما كانت ..  المهم ان بكرة و باقي 
المراحل تعدي علي خير من غير مشاكل 

لازم نفرح بأول تجربة انتخاب لينا ...  كل انتخابات و انتم طيبين

No comments:

Post a Comment