ساعات ربنا بيكتبلك انك تتعرف علي ناس يجبروك تعيد تفكير في حياتك و تتعرف علي حاجات جديدة. أنا بقي ربنا رزقني (و الحمد لله) بأكثر من حد من الناس دي.
من أهم الناس دي بقي: أحمد عبد الحميد .
مبدأيا نقول ألف مبروك "الدكتور المهندس" أحمد عبد الحميد
أنا أعرف أحمد من أقل من سنة بس اللي اتعلمته منه في السنة دي أكثر من حاجات اتعلمتها من ناس ثانية في سنين رغم إن كل معرفتنا كانت خلال "الفضاء الافتراضي".
في أول معرفتنا قلت له "حاسة ان ربنا عترني فيك لسبب" و من ساعتها و كل يوم باكتشف سبب جديد.
من الحاجات اللي اتعلمتها بسببه:
- القراءة: أنا بحب القراءة من زمان بس كنت بقرأ اللي علي مزاجي بس. أحمد علمني ان الواحد لازم يقرأ في أكثر من مجال. أول واحد خلاني أقرأ سياسة و أنا عمري ما فكرت أقرا كتاب عن السياسة. اتعلمت منه ان الواحد لازم يعمل تنويع سواء في اللغة أو مجال الكتب اللي بيقراها. أول واحد خلاني أعمل هدف لعدد كتب محدد في السنة عشان القراءة تبقي عادة عندك مش بس هواية.
- المثابرة و التصميم و الحق: دفاعه عن مبادؤه و قناعاته بيذهلني كل مرة. أتمني يبقي عندي نصف تصميمه ده.
- مساعدة الغير: كان سبب رئيسي في شغلي مع أكثر من حد بحاجات بسيطة بالنسبة ليا بس كانت مهمة لهم. بسببه اكتشفت ان في طرق كثير انك تساعد غيرك، المهم انك فعلا تبقي عايز تساعد. صحيح أنا مقصرة في شغل بينا واقف من ساعة ما البلد اتقلبت بس إن شاء الله كل حاجة هتتصلح.
- التحليل: علمني إن مفيش حاجة ينفع تعدي كده عادي. كل حاجة لها سبب و نتيجة و هدف. لما تحب تفهم حاجة، حاول تحللها و تربطها بحاجات شبها هتفهم حاجات أكثر بكثير.
- السياسة: أول واحد خلاني أشوف قد ايه السياسة مرتبطة و متشابكة بحياتنا اليومية.
- و أخيرا ان أنا ممكن أعمل الماجستير اللي أنا مقررة ألغيه و أعمل دكتوراة بعده عشان أخد لقب "دكتورة مهندسة" (بما إن أنا كان نفسي أبقي دكتورة جراحة بس طلعت مهندسة غلط)
زي أول مرة قلتها له "أنت أنسان مش عادي و اللي اتعلمتوا منك كان صعب اتعلموا من أي حد. بسببك غيرت فيا حاجات كثير للأحسن."
ألف شكر و احترام و تقدير للدكتور المهندس أحمد عبد الحميد .
No comments:
Post a Comment