ساعات ربنا بيكتبلك انك تتعرف علي ناس يجبروك تعيد تفكير في حياتك و تتعرف علي حاجات جديدة. أنا بقي ربنا رزقني (و الحمد لله) بأكثر من حد من الناس دي.
من أهم الناس دي: فيكتور ابراهيم (أو vicas زي ما بحب اقوله)
أصل الجدعنة الإسكندراني اللي علي حق.
من ساعة ما عرفته و عمري ما شفته غير مبتسم حتي و هو في العناية المركزة في حادثة القديسين.
من كثر الحوادث اللي حصلتله .. بحس إن هو اللي بيروح لها مش هي اللي بتحصله :)
كتلة تفاؤل متحركة حتي لما الدنيا بتقفل معاه. قمة في الإجتهاد و الإصرار. طيبة قلب ملهاش حدود. جملة "صاحب صاحبه" اتعملت عشانه.
مضايق من حاجة .. كلم فيكتور
مبسوط من حاجة .. كلم فيكتور
محتاج حاجة .. كلم فيكتور
فاضي و عايز ترغي .. كلم فيكتور
مكتئب و عايز تهيس .. كلم فيكتور
"كلم فيكتور" ... عمرك ما هتندم و اكيد هتتبسط
رغم إنه مسافر كمان كام يوم و لسه مش عارفة هغتت علي مين بعد كده بس متأكده إنه هيبقي دكتور ممتاز.
سافر و اتبسط و انجح و اتميز و استمتع بكل لحظة هتعدي عليك.
شكرا فيكاس علشان لسه مستحملني رغم دماغي اللي راكبة شمال :)
No comments:
Post a Comment