Sunday, May 22, 2011

يوم 27/5 هاقعد في بيتنا

لأ طبعاً أنا مش جبان ولا ناسي دم الشهداء
وطبعاً مش عاجبني المجلس العسكري وأداؤه ولا حتى أداء حكومة عصام شرف

لكن كل الحكاية إن يوم 27/5 الوقفة هايكون مطلبها الأساسي عمل مجلس رئاسي وعمل الدستور قبل الإنتخابات البرلمانية

وهي دي المشكلة بالنسبة لي وأكيد بالنسبة لك لو كنت ديمقراطي

أوضحلك

الإستفتاء اللي فات كان الإستفتاء الديمقراطي الوحيد في تاريخ مصر اللي إحنا عشناه
صح؟
 طب يعني إيه ديمقراطية ؟

يعني وانا نازل رايح ع الصندوق  أدي صوتي باعترف إني راضي بالنتيجة حتى لو طلعت مش على مزاجي وإلا ماكنتش رحت من الأساس

والنتيجة طلعت إيه!!!!!؟
 طلعت إن الشعب في أول إستفتاء نزيه بعد زوال الديكتاتورية قال إنه عاوز ينتخب برلمان يشرف على عمل الدستور
 يبقى سواء كنت قلت أه أو لأ لازم ألتزم باختيار الشعب

وعلشان كدة ما ينفعش أنزل في وقفات أو إعتصامات أو ثورات بتنقلب على إختيار الشعب
 كدة مش هاكون ديمقراطي بالعكس هاكون ديكتاتور

لأني ساعتها هاكون باقول ياسكتي يا مافيش سكك تانية زي ما الأمريكان بيقولوها
My Way or the Highway

هاتقولي بس الوقفة يوم 27 ليها أهداف أخرى وكلنا موافقين عليها زي التأكيد على محاكمة مبارك وغيره
هاقولك ماشي بس الهدف الأول اللي اتقال هو إيه !!!!؟

يعني لو نزلنا علشان أي حاجة تانية هانتعد غصب عننا كأننا عاوزين مجلس رئاسي ودستور قبل البرلمان
أقولك طب ماتخليهم يلغوا الهدف ده وانا أنزل على طول واشارك في الوقفة دي

إيه !!!! مش سامعك !!! المنظمين مش هايرضوا !!!؟
 مش باقولك ... جالك كلامي

إحنا بيتضحك علينا وبيتم استغلال غضبنا من بعض مواقف الجيش أو حتى كلها علشان ننقلب على الإختيار الديمقراطي للشعب

اللي هو برلمان منتخب يكتب دستور جديد
وكدة ماينفعش
 
أنا مش عاجبني طبعاً القرارات اللي بتتاخد لكن مين يضمن إن مجلس رئاسي هاتكون قراراته حلوة ويلاقي قبول؟

لو احنا عاوزين حكومة تعبر عن الشعب يبقى المفروض نضغط لتقديم الإنتخابات مش تأجيلها
لأن أي كيان مؤقت هاتكون قدرته ضعيفة سواء جيش أو حكومة إنتقالية أو حتى مجلس رئاسي
كل دول مؤقتين ولن يرضى عنهم الشعب

فاكر عصام شرف
في الأول كنا فرحانين بيه ودلوقتي أداء حكومته مش عاجبنا
عارف ليه !!!!؟
لأنه مؤقت يعني مش قوي بالدرجة الكافية لفرض كلمته 
 
لما نعمل إنتخابات بسرعة يبقى إنتقلنا من حالة المؤقت لحالة الدائم
وهو ده مفهومي للإستقرار

أي حاجة دلوقتي مؤقتة حتى لو طلع دستور جديد بدون برلمان 
لازم نوصل للدائم

والحل إن كيان قوي ودائم - غير مؤقت - مدعوم من الشعب يقود البلد ومافيش وسيلة غير الإنتخابات البرلمانية تقدر توصلنا للكيان القوي ده فياريت مانضحكش على نفسنا ونصدق حاجة تانية

بص النداء للثورة التانية صريح وفج دول حتى مش بيقولوا مليونية أو مظاهرة دول بيقولوا ثورة تانية

طب ثورة على إيه !!!!؟
على المجلس العسكري !!!؟

وماله أنا معاهم ياسيدي ماهو مش عاجبني زي ما أي حد تاني هايمسك بصورة مؤقتة مش هايعجبني

لكن إنهم يطلبوا عمل الدستور قبل البرلمان يبقى الثورة اللي بينادوا بيها ساعتها وضح إنها ثورة على قرار الشعب في الإستفتاء اللي فات

بصراحة أنا عاوز الشعب يصيغ دستوره بنفسه علشان يبقى دستور معبر عن البلد ونخلص من الشيزوفرانيا السياسية اللي عايشينها دي
ولا إيش قولك !!!!؟

لو نزلت والهدف ده موجود هابقى ديكتاتور
وانا مش ديكتاتور علشان كدة هاقعد في بيتنا يوم 27/5
واهو فرصة نريحلنا جمعة ولا إيه رأيك ؟

بصراحة كدة خلصونا من الهبل ده وهاتولنا صندوق إنتخابات بسرعة علشان نخلص
غير كدة هانفضل نلف في حلقة مفرغة
وماحدش هايعجبه حاجة

واحشني يا صندوق يا قزاز يابو فتحة من فوق

محمد مصري
20/5/2011

المقال الأصلي هنا

No comments:

Post a Comment